Русија ќе разгледа како да овозможи враќање на странските брендови и компании на својот пазар, земајќи предвид пред сè интересите на домашниот бизнис. Условите за враќање на западните компании ќе се разликуваат од претходните, кажа рускиот министер за економски развој, Максим Решетников. Тој истакна дека заминувањето на странските компании им донело нови шанси на руските фирми, како и на компаниите од пријателските земји. „Тие успешно ја искористија ваквата ситуација. Покрај тоа, државните програми за поддршка, вклучувајќи го секторот за мали и средни претпријатија, овозможија брзо пополнување на празнините и зголемување на понудата на производи и услуги“, изјави Решетников. Тој додаде дека руските компании вложиле значајни средства за да го пополнат просторот кој остана слободен по повлекувањето на странските компании. „Сега е пресудно да се обезбеди дека овие инвестиции ќе донесат посакуван поврат“, посочи тој. Во исто време, министерот нагласи дека е важно да се внимава на потребите на потрошувачите, да се регулираат цените на пазарот и да се овозможи чесна конкуренција. „Руската економија сега е другачија и руската пазарна средина ќе остане достапна. Секоја одлука ќе се носи индивидуално, имајќи ја во предвид целата актуелна ситуација. Поради трансформациите во економијата, условите за доаѓање на странските компании, било да е тоа локализација, инвестиции или технологија, ќе бидат значително различни“, заврши Решетников.
