Тешка сообраќајна несреќа во Албанија: Камион со скопски таблички учествувал во судир – загина жена
Во сообраќајна несреќа што се случила ноќеска околу полноќ на патниот правец Прењас-Либражд во Албанија, учествувал камион со скопски регистарски ознаки управуван од македонски државјанин.
Според албанските медиуми, несреќата се случила во близина на преминот Ќафасан, на местото викано Пишкаш, околу 00:10 часот. Судирот бил меѓу патничко возило „Мерцедес“ и камион што го управувал македонски возач.
Во несреќата загинала сопатничката во автомобилот, додека возачот, 34-годишниот Зеф Синани, се здобил со тешки повреди. Тој првично бил пренесен во болницата во Либражд, а потоа транспортиран во регионалната болница во Елбасан поради сериозноста на повредите.
Првичните информации укажуваат дека возење со прекумерна брзина би можело да биде една од главните причини за несреќата. Албанските власти веќе спроведуваат истрага за утврдување на точните околности.
Овој случај го следат и македонските надлежни институции.Дополнителни информации се очекуваат во наредниот период.
