Доколку САД и Иран успеат да избегнат нова ескалација и да постигнат долгорочно примирје, последиците од кризата во Персискиот Залив би можеле да се чувствуваат во светската економија долго време, предупредуваат експертите за енергетика и транспорт. Според анализите, повторното отворање на Хормушкиот теснец не гарантира автоматска стабилизација на пазарите. Иако многу политичари и инвеститори веруваат дека цените на нафтата и гасот ќе опаднат брзо, лидерите во енергетскиот и бродскиот сектор нагласуваат дека опоравувањето може да потрае месеци, па дури и години.
Извршниот директор на саудискиот нафтен магнат „Арамко“, Амин Насер, изјавил дека дури и ако теснецот веднаш биде целосно отворен за сообраќај, потребни ќе бидат неколку месеци за пазарот повторно да се стабилизира. Доколку блокадите продолжат уште неколку недели, нормализацијата би можела да се одложи до 2027 година. Во меѓувреме, цените на нафтата остануваат околу 30 проценти повисоки во однос на периодот пред конфликтот, што директно влијае на цените на горивата, транспортот, вештачките ѓубрива и храната.
Недовербата во бродските компании продолжува да биде проблем, бидејќи тие страдаат од страв од нови напади во регионот. Осигурителните премии за пловидба низ Хормушкиот теснец се високи, а експертите проценуваат дека ќе бидат потребни најмалку неколку недели стабилност пред бродовите да се вратат во масовен сообраќај на оваа рута.
Значителни штети се регистрирани на енергетската инфраструктура во регионот. Десетици нафтени полиња, рафинерии, гасоводи и постројки за течен природен гас биле оштетени за време на конфликтот. Обновата на дел од капацитетите за производство на течен природен гас во Катар се очекува да трае од три до пет години.
Експертите укажуваат и на тоа дека глобалните резерви на нафта постепено се намалуваат, а во текот на летото светскиот пазар би можел да се соочи со сериозен недостиг. Ако резервите продолжат да се намалуваат, единствениот начин за намалување на побарувачката би биле повисоките цени. Некои аналитичари не ги исклучуваат можностите цените на енергенсите дополнително да се зголемат, што може да предизвика нов бран инфлација и ризик од глобална економска рецесија.
