Вечерва, во 18:45 часот, во холот на гимназијата „Орце Николов“ ќе се одржи промоција на романот „Сета боја зад црнината“ од Васја Мицковски.
Овој роман на младиот автор веќе доби свое место меѓу читателите, откако минатата недела стана достапен во издание на ТРИ. Иако не е негово дебитантско дело, Мицковски минатата година ја објави својата филозофско-психолошка повест „Апокалипса на младиот роб“, прирачник за животот на младите. Во 2024 и 2025 година, тој беше награден за најдобра песна од млад автор на конкурсот по повод Анте Поповски. „Сета боја зад црнината“ не е првото книжевно дело на авторот, но претставува неговиот прв значаен роман, издаден од една од најпознатите издавачки куќи во нашиот регион. Корицата на романот ја изработи Љупка Стојкова.
Промоцијата е најавена како спој на различни уметности. Во улога на промотори ќе настапат проф. Маријана Ѓорѓиева-Ристевска и писателката Виолета Танчева-Златева, заедно со младите илустраторки Викторија Димовска, Михаела Белдедовска, Дариа Илиевска и Јана Самарџиева, кои ќе се вклучат во разговорот.
„Чудесно е чувството кога наидуваме на дебитански роман со високи уметнички вредности“, истакна Танчева-Златева. „Васја Мицковски создаде прекрасно дело за љубовта и убавината, за нераскинливото пријателство, полн со бои од природата и животот. Тоа е златно камче во мозаикот на уметноста, единственото што може да го победи времето.“
Во својата објава за настанот, издавачката куќа ТРИ најавува одличен роман. Васја Мицковски исто така спомена дека промоцијата ќе биде обогатена со музички изведби на пијано и мандолина, интересни разговори и загатливи посвети.
