Во Кинотеката на Македонија денеска се одржа комеморација во чест на фимскиот продуцент Панче Мижимаков – Панта, влијателна фигура во македонската кинематографија. Роден во Велес во 1946 година, уште додека бил студент на Академијата за театар, филм, радио и ТВ во Белград, Мижимаков започнал соработка со Академскиот киноклуб во Скопје, каде што учествувал во создавање на аматерски филмови во различни улоги како актер, режисер, снимател и организатор. Професионално неговата кариера продолжила во „Вардар филм“, каде учествувал во производството на бројни документарни, кратки и долгометражни играни филмови, како организатор, а подоцна и како директор на филм и продуцент. Негово дело е признаено во рамки на домашни, југословенски и меѓународни копродукции, соработувајќи со истакнати македонски режисери како С. Попов, Б. Гапо, Д. Османли, С. Црвенковски и други.
Панта оставил значителен белег во македонската кинематографија и во 1991 година основал „Пегаз“, една од првите приватни продуцентски куќи во Македонија. За своето долгогодишно придонесување, во 2018 година бил награден со „Златен објектив“ од Кинотеката на Македонија. Директорот на Кинотеката, Бошко Грујоски, нагласил дека Панта секогаш бил присутен за да ги поддржи своите колеги и дека архивата под кино салата е богата со документи и материјали кои сведочат за неговата работа и значење.
Режисерот Јани Бојаџи, долгогодишен соработник на Панта, го опишал како последниот македонски филмски пророк, чија способност за предвидување успех на филмови и таленти била неверојатна. Панта бил ценет за својата способност да препознае убавина и вредност не само во кадарот, туку и надвор од него.
Илинденка Петрушева, филмолог и пријателка, се присетила на моменти од неговиот професионален и приватен живот, истакнувајќи ги нивните заеднички искуства и неговата поддршка кон нејзините лични и професионални патувања.
