Министерството за образование и наука, во соработка со Центарот за трансфер на технологии и иновации ИНОФЕИТ при Факултетот за електротехника и информациски технологии во Скопје, воведе нов напреден асистент за поддршка на корисниците на Е-дневникот. Овој интелигентен софтвер е развиен на основа на архитектурата RAG (Retrieval-Augmented Generation) и е интегриран во системот на Е-дневникот, овозможувајќи софистицирано пребарување и генерирање прецизни одговори на прашањата на корисниците.
Според информациите од Министерството, четботот ќе ја забрза и подобри обработката и структуирањето на документацијата, создавајќи сеопфатна база на знаење на македонски и албански јазик. Ова решение е дизајнирано да им олесни на наставниците, училиштата и другите корисници да дојдат до важни информации и да добијат побрза техничка поддршка.
Системот веќе е имплементиран и хостиран на сигурна облак-платформа, со вградени механизми за заштита и контрола на содржината, како и систем за мониторинг и оптимизација за следење на перформансите и анализа на користењето.
