Комисијата за заразни болести предложи низа мерки со цел да се спречи ширењето на грипот.Како резултат на тоа, Министерството за здравство донесе одлука јавните здравствени установи доследно да ги почитуваат овие препораки.
Според воведените мерки, посетите на хоспитализирани пациенти се забранети за да се намали ризикот од ширење на вирусот во болничките средини. Дополнително, се нагласува важноста на почитувањето на протоколите за лична заштита, како што се носење заштитни маски, редовна дезинфекција на рацете и одржување на физичка дистанца онаму каде што е тоа возможно.
– Овие мерки се неопходни за заштита на здравјето на пациентите и медицинскиот персонал, имајќи ги предвид најновите епидемиолошки податоци кои покажуваат зголемување на бројот на заболени од сезонски грип.Комисијата за заразни болести и понатаму внимателно ја следи состојбата, се наведува во соопштението од Министерството за здравство.
Според податоците објавени од Институтот за јавно здравје – Скопје, во периодот од 3 до 9 февруари 2025 година во земјата се регистрирани 2.880 случаи на заболени од грип или заболувања слични на грип. Ова претставува намалување од 5,1% во споредба со претходната недела.
Од вкупниот број на пријавени случаи, 1.552 лица се во возрасната група од 15 до 64 години, 685 случаи се регистрирани кај деца од 5 до 14 години, 371 кај деца до 4 години, а 272 случаи се забележани кај лица постари од 65 години. Највисока стапка на инциденца е забележана кај најмалите,односно кај децата под 4 години.
Што се однесува до територијалната распределба, најголем број заболени се пријавени во Скопје – 692 случаи, потоа во Струмица со 333, Битола со 304, Свети Николе со 158, Охрид 141, Велес 140, Радовиш 122, додека во Кавадарци и Куманово се регистрирани по 109 случаи.
