Израел издаде наредби за евакуација на девет населени места во јужен Либан, по што илјадници граѓани почнаа да ги напуштаат своите домови од страв од нови воени операции. Според локалните извори, во денешните напади на израелските сили загинале шест лица, само еден ден откако Хезболах го одбил предложениот договор за прекин на огнот. Меѓу бегалците се наоѓаат и стотици фамилии од селото Анкун, кое во последно време било засолниште за многу раселени лица од други делови на јужен Либан.
Израелската армија соопшти дека во скоро време ќе дејствува против цели поврзани со Хезболах во регионот и им нареди на жителите веднаш да го напуштат областа. Патиштата кон градот Сидон се преполни со возила, бидејќи семејствата бараат побезбедни локации. Во текот на денот, израелските сили извршија неколку воздушни напади во јужен Либан, при што беа регистрирани напади со беспилотни летала во областите околу Набатија, додека авијацијата и артилеријата дејствуваа врз Кфар Тебнит.
Израелскиот премиер Бенјамин Нетанјаху нареди интензивирање на офанзивата откако израелските сили ја презедоа контролата над стратешката тврдина Бофор. Од друга страна, Хезболах соопшти дека возвратил со ракетни напади врз израелските сили во близина на тврдината. Овие судири произлегуваат од неуспехот на иницијативата за примирје, која беше посредувана од САД и поддржана од либанската влада.
Либанскиот премиер Наваф Салам изјави дека земјата не смее повеќе да биде полигон за туѓи конфликти. „Либан повеќе не може да биде место за туѓи војни, а југот на нашата земја и неговите жители не можат повеќе да плаќаат цената за одлуки што не ги донеле“, порача Салам.
Во меѓувреме, Израел и Либан водат одвоени преговори во Вашингтон со цел постигнување на прекин на огнот, но аналитичарите оценуваат дека шансите за успех се ограничени без директна согласност од Хезболах. Според последните податоци, од почетокот на конфликтот, во израелските напади во Либан загинале повеќе од 3.500 лица, додека Хезболах, со своите дејства, усмртил најмалку 29 израелски војници и тројца израелски цивили.
