Премиерот Христијан Мицкоски денеска се сретна со Македонците од Туминец, Преспа и Мала Преспа, при што истакна дека Македонија има потреба од национално обединување и заедништво околу основните државни интереси. Тој нагласи дека обединетоста треба да се гради околу иднината на децата, почитта кон историјата и достоинството на македонскиот народ.
„Нашите предци не се делеа кога ја бранеа слободата. Не прашуваа кој од каде е, ниту кој на кого припаѓа. Сите стоеја под едно име – Македонија“, посочи премиерот.
Мицкоски додаде дека Македонците во Албанија се „нераскинлив дел од македонското национално ткиво“ и им оддаде почит за нивната улога во чување на македонскиот идентитет низ годините. „Вие го сочувавте македонското име, јазикот, традицијата и духот, дури и во најтешките моменти“, истакна тој.
Во пораката до Македонците во Албанија, премиерот увери дека Македонија никогаш нема да ги заборави. „Матицата ќе ве памти. Македонија стои со својот народ каде и да се наоѓа, со почит, грижа и искрена поддршка“, заврши Мицкоски.
