Обединетите Арапски Емирати во последно време се обиделе да ги убедат соседите од Заливот, вклучувајќи ги Саудиска Арабија и Катар, да се приклучат на заедничка воена акција против Иран, по неодамнешните ирански напади во регионот. Иницијативата, сепак, била одбивена, соопштија од “Блумберг”. Според непотврдени извори, шеикот Мохамед бин Зајед ал Нахјан, претседател на Обединетите Арапски Емирати, контактираше со регионалните лидери веднаш по почетокот на американско-израелските нападa врз Иран на 28 февруари.
Шеикот сметал дека заливските држави треба да заеднички реагираат за да го одвратат Техеран, по што Иран во последно време лансирал бројни дронови и ракети кон различни цели низ Заливот, вклучувајќи важни инфраструктури и енергетски објекти, а затвори и Ормускиот Теснец, што предизвика значителни проблеми во извозот на нафта и гас. Меѓутоа, саудискиот престолонаследник Мохамед бин Салман и други лидери од регионот изјавиле дека конфликтот „не е нивна војна“. Ова одбивање дополнително ги заострило ионака напнатите односи меѓу Абу Даби и Ријад.
Во текот на разговорите, Мохамед бин Зајед ја спомнал историјата на Советот за соработка во Заливот, основан во 1981 година, делумно поради стравот од Иранската исламска револуција. Сепак, Катар, Бахреин, Кувајт, Оман и Саудиска Арабија сетаа на крајот да одбијат воена координација. Катар, иако размислуваше за возврат по нападот на иранската структура за течен природен гас “Рас Лафан” во март, на крајот се фокусираше на дипломатските напори за намалување на тензиите.
По неуспехот во собирањето на заливските сојузници, Обединетите Арапски Емирати спроведоа ограничени воени напади врз Иран и ја продлабочија безбедносната соработка со Израел. Според “Блумберг”, она што следуваше вклучувало размена на разузнавачки информации, системи за рано предупредување и пресретнување на ракети. Обединетите Арапски Емирати беа меѓу најчестите мети на иранските напади, при што Техеран лансираше близу 3.000 дронови и ракети, пред да биде постигнат прекин на огнот во април.
Во продолжение, Иран ги обвини Обединетите Арапски Емирати за поддршка на воените акции на САД и Израел против Техеран. Иранскиот министер за надворешни работи, Абас Арагчи, на самитот на БРИКС во Индија, ги означи Обединетите Арапски Емирати како “активен учесник во агресијата”. Пред тоа, “Волстрит журнал” објави информации дека Обединетите Арапски Емирати тајно спровеле воени напади врз Иран, вклучувајќи напад на значајна иранска нафтена рафинерија. Американскиот претседател Доналд Трамп оцени дека кревкиот прекин на огнот меѓу САД и Иран сè уште важи, но дека “едвај опстојува”, а најновиот мировен предлог од Иран го оцени како “целосно неприфатлив”.
